Ekki veitir af!

Það var tími til kominn að eftirlit væri haft með notkun stefnuljósa. Alltof margir sleppa því alfarið að nota stefnuljós. Enn aðrir gefa stefnuljós í beygju (er það til að tilkynna hinum að viðkomandi sé að beygja rétt í þessu).

Er þessu sértstaklega ábótavant í hringtorgum, eins og þau eru nú orðin algeng um allt höfuðborgarsvæðið. 

Ég kalla eftir gömlu umferðarþáttunum hans Ómars Ragnarssonar þar sem umferðarreglur, notkun stefnuljósa, akstursstefnur og fleira var tekið til umfjöllunar. Það þyrfti að endurgera þessa þætti og með þá Ómar í fararbroddi. 

 

Eftirlit með notkun stefnuljósa

Við hverju búast menn?

Áhrif framboðs og eftirspurnar gilda þarna líka! Það er búið að byggja alltof mikið síðustu árin, bæði af íbúðarhúsnæði og atvinnuhúsnæði. Það er lítil sem engin eftirspurn eftir hrunið og í raun óráðsrýja að hafa farið út í allar þessar byggingar. Í þessu litla land með lítinn markað, hverjir áttu að búa í öllu þessu húsnæði og hvaða ótal fyrirtæki áttu að kaupa allt þetta atvinnuhúsnæði. Ég hef á tilfinningunni að þarna hafi verið búið til, tilbúin þörf á húsnæði til að viðhalda óeðlilegum byggingarmarkaði. Þenslu! Það sá hver almennur borgari að þetta var reikningsdæmi sem ekki gekk upp. Allt þetta húsnæði sem nú stendur autt mun ekki seljast nema á niðursettu verði. Offramboð á nýjum bílum leiddi til þess að þeir voru fluttir út aftur, en húsnæði flyst ekki neitt! Það er ekki annað í stöðunni en að selja það á undirverði eða að það verði eyðileggingunni að bráð með tíð og tíma. Menn verða að sætta sig við það að markaðslögmálin er enn í fullu gildi!!!

Grundarblokkin getur valdið verðfalli

Gleðilegt ár - hvað ber nýtt ár í skauti sér?

Gleðilegt ár og takk fyrir gamla árið, kæru bloggvinir. Það hefur ekki farið mikið fyrir bloggi hjá  mér síðustu mánuði. Það hefur verið frekar knappur tími til þess. Nú er þessu stormasama ári í þjóðfélaginu á enda og nýtt er hafið. Hvað það mun bera í skauti sér er alls óvitað.

Í mínum huga um hver áramót er hvert nýtt ár eins og óskrifað blað, "blað" sem gefur fyrirheit um betri tíma, tækifæri og ævintýri. Hvað kemur til með að standa á blaðinu í árslok er mikið undir okkur komið. Við höfum það í okkar höndum að nýta okkur tækifærin, tileinka okkur nýja þekkingu, njóta tímans með vinum og ættingjum og gera hverja stund að stund gleði og fyllingar í lífinu. Stundum tekst okkur þetta og stundum ekki. Við gleymum okkur oft í amstri hversdagsins og gleymum að vera til. Gleymum að gleðjast yfir því litla og njóta samvistanna. Hver stund er innlegg inn í framtíðina.  

Hverju getum við stjórnað? Engu nema augnablikinu. Við breytum ekki fortíðinni, hún er farin og kemur ekki aftur. Við ráðum ekki framtíðinni. Hún er ókomin, en við getum lagt inn til framtíðarinnar með því sem við gerum og segjum í þessu augnabliki sem við höfum stjórn á.  

Það er von mín að ástandið í þjóðfélaginu taki breytingum og fari að taka rétta stefnu á þessu ári sem nú er hafið.

Árið er enn óskrifað blað, gætum þess að eitthvað gott komist á blaðið, eitthvað vitrænt og gefandi, eitthvað sem markar spor inn í framtíðina. Vöndum "skriftina". 

Góðar stundir. 

Gott hjá þeim!

Annað hvort er Fréttablaðið fríblað fyrir alla eða ekki! Það er ekki flóknara en það. Ég myndi ekki kaupa það meðan aðrir fá það sent til sín frítt. Ég skil ekki svona mismunun eftir búsetu. Ég held að eigendur blaðsins verði að gera það upp við sig hvers konar blað Fréttablaðið á að vera. Hins vegar grunar mig að ef blaðið verður áskriftarblað, þá verða dagar þess taldir.

Neita að selja Fréttablaðið í Eyjum

Í friði og ró!

Vonandi fær geitargreyið að vera til friðs þessi jólin. Ég á svo erfitt með að skilja svona skemmdarverk á því sem er sett upp til að gleðja aðra, þó sérstaklega börn.

Innbrotin í Skálholtskirkju og í Sólheimakirkju um helgina er líka eitt af því sem ég er ósátt við. Stela prestshempu, til hvers? Auðvitað er verið að reyna að koma gripum í verð, en ég er hrædd um að fáir muni kaupa prestshempu.  Vonandi komast þeir gripir sem teknir voru ófrjálsri hendi  í leitirnar. 

Jólageitin í Gävle sögð þola eldsprengjuárás

Skammarleg aðför að réttindum nýbura!

Einhvern veginn hefur umræðan alltaf snúist um rétt foreldranna til fæðingarorlofs, sem er gott og gilt svo langt sem það nær. Hvað með rétt nýborinna barna til samvista við foreldra sína fyrstu mánuðina í lífi þeirra?

Áður en umræðan um skerðingu á fæðingarorlofi til feðra kom til umræðu var fyrir ákveðin mismunun á milli réttinda barnanna til samvista við foreldri fyrstu mánuðina. Barn sem átti foreldra sem annaðhvort voru í sambúð eða hjónabandi átti rétt á allt að 9 mánuðum í samvistum við foreldra sína meðan barn einstæðrar móður átti aðeins rétt á 6 mánuðum í samvistum við foreldri. Þurfti því fyrr að fara í daggæslu en ella. 

Sú tillaga nú að skerða rétt einstæðra mæðra til fæðingarorlofs um 1 mánuð eða fresta töku 1 mánaðar er til háborinnar skammar. Þarna er að mínu mati gróflega gengið á rétt  barnsins og sömuleiðis móðurinnar sem hefur mun meiri þörf á að taka þessa mánuði alla, þar sem litlar sem engar líkur eru á því að faðirinn komi til með að annast barnið eða nýta sinn rétt til fæðingarorlofs. 

Ég hvet Félagsmálaráðuneytið að hverfa frá þessum hugmyndum. Þurfi að velja á milli tel ég betra að skerða rétt föðurins en einstæðra mæðra. 

Mér finnst staðan hreinlega orðin þannig að það eigi að skera niður allsstaðar og verið sé að færa krónurnar úr hægri vasanum í vinstri þar sem þær gætu kannski komið sér betur. Er þetta samkvæmt tilskipun frá AGS (Alþjóða gjaldeyrissjóðnum) ? Er svo saumað að okkur að þeir sem minnst mega sín, yngstu þjóðfélagsþegnarnir, þurfi að líða skerðingu að þessu tagi? Þá er orðin verulega aum staða okkar Íslendinga hvað varðar velferð og mannréttindi. 

Fæðingarorlof með því stysta á Norðurlöndum

Bandaríska heilbrigðiskerfið í hnotskurn!

Þetta er ekkert óalgengt í Bandaríkjunum að efnaminna fólk sem ekki hefur efni á sjúkratryggingum endi í gröfinni fyrir aldur fram eftir langar þjáningar. Vonandi tekst Obama að koma á almennu heilbrigðiskerfi sem allir njóta ekki bara þeir sem hafa efni á því.

Ég vona að við eigum aldrei eftir að sjá slíkt gerast hér. 

Sat í átta mánuði í stól þar til hann dó

Umhugsunarvert fyrir okkur íslendinga.

Þetta myndi líklega ekki þykja neitt sérstaklega margir yfirvinnutímar á íslenskan mælikvarða. Mér er minnistætt þegar ég vann hjá einu stærsta stéttarfélagi landsins og var að yfirfara vinnuskýrslur nokkurra félagsmanna á heilbrigðisstofnunum með tilliti til hvíldartíma. Mikil mannekla var á þessum tíma og mikið um vaktir sem þurfti að dekka með aukavinnu annarra starfsmanna. Ég var að sjá fjölda aukavakta frá 12 vöktum og allt upp í 15 vaktir á mánuði fyrir utan fullt starf viðkomandi starfsmanna sem þýðir að meðaltali  14 x 8  = 112 yfirvinnutímar. Það hefur löngum þótt eðlilegt hér að vinna mikla aukavinnu. Í byggingarvinnu var kváð ef einhver sagðist vinna bara 8 tímana!!! Er ekki alveg nóg að vinna 8 klst. vinnudag með tilliti til heilsu, vinnuafkasta, heimilislífs og almennt með tilliti til þess að geta átt eitthvað annað líf en vinnuna! Jú, líklega, en fjárhagslega mjög erfitt fyrir marga. En hvers virði er öll aukavinnan? Hún er lítils virði þegar heilsan er farin og hvað þá að þegar fólk fellur frá öllu sínu í blóma lífsins? Þetta er umhugsunarvert.

Vann of mikið og lést

Flottur skóli og flott skólastýra!

Þessi skóli finnst mér alveg frábær. Ég held að þessi skóli sanni gildi sitt í nútíma þjóðfélagi. Hraðinn í nútíma þjóðfélagi hefur gert það að verkum að sumt af þekkingu og færni í að elda mat frá grunni, hanna og sauma föt frá grunni hafi glatast á síðustu árum hjá ákveðnum kynslóðum. Meira hefur verið keypt tilbúið og enginn tími til að gera sjálfur. Nú hefur dæmið snúist við og aldrei eins mikill áhugi að prjóna, sauma og vinna frá grunni eins og nú.

Mér finnst Margrét skólstýra flott kona, mikill kvenskörungur og glæsilegur fulltrúi íslenskra ofurhúsmæðra. Ég myndi vilja sjá hana í nýjum sjónvarpsþætti með alls kyns húsráð til kynningar, matseld og fleira sem kemur að notum við rekstur á heimilum. 

Nútímahúsmæður læra til verka

Kröfur lækkaðar og fagmennsku og þekkingu stungið undir stól?

Ég skil ekki hvernig þetta er hægt! Það tekur langan tíma að þjálfa góða slökkviliðsmenn og gerðar eru strangar kröfur um grunnþekkingu og líkamlega burði við inntöku nýliða. Síðan tekur við löng og stíf þjálfun. Mér finnst þetta eins og það geti bara allir tekið þetta starf að sér eins og ekkert væri. Er verið að lækka kröfur og stinga fagmennsku undir stól? Er næsta skrefið að hver sem er geti tekið að sér störf löggæslu og annarra slíkra starfa án krafna um líkamlega og andlega getu og þjálfunar sem þessi störf krefjast?

Auglýst verður eftir fólki til að annast viðbragðsþjónustu