Klukkuð af Steinku

Jæja, þá náði Steinka að klukka mig.  Ég á að nefna 8 atriði um sjálfa mig.  Ég hef rosalega gaman af því að syngja og geri mikið af því, sérstaklega ef við systikinin náum að radda eitthvað saman. Mér finnst ofboðslega gaman að gera tilraunir í eldhúsinu, hvort sem er um bakstur að ræða eða elda. Leiðinlegasta sem ég geri er að vaska upp og taka til í eldhúsinu. Ég elska dýr, hunda, ketti og flest þau dýr nema pöddur, ég ætlaði mér alltaf að verða bóndakona.  Mér finnst ofboðslega gaman að ferðast, sama hvort um er að ræða hérna heima eða í útlöndum. Það er svo gaman að þvælast um landið, helst í tjaldi og heimsækja þorpin, renna fyrir fisk á bryggjum landsins, gerist ekki betra. Mér finnst yndislegt að sitja á góðum tónleikum og hlusta á góða tónlist.  Mér finnst öll garðvinna skemmtileg. Það er yndislegt að slá garðinn, finna graslyktina og potast í mold og sjá allt vaxa. Ég held að ég hafi verið sú eina í hópnum hér á yngri árum sem fannst gaman í unglingavinnunni.  Ég er óskaplega hrifin af öllum berjum, bláberjum jarðarberjum, brómberjum, hindberjum en þó sérstaklega ferskum kirsuberjum.  Við Linda vinkona söfnuðum alltaf saman klinkinu okkar hér í den til að kaupa fersk kirsuber hjá Silla og Valda í Austurstræti, þegar við vorum að sendast fyrir Ferðamiðstöðina. Þá var veisla hjá okkur.  Ég held ég sé örugglega komin með átta atriði. Nú ætla ég að gerast svo kræf að klukka  Benna, Ingibjörgu Stefáns, Baldur Kristjáns, Bjarna Harðar, Siggu Óla og Björgu Árna.

Athugasemdir

[Valgerður Halldórsdóttir, 17.7.2007 kl. 20:57]

Svo varstu líka fimleikakona - áfram Ármann  

[Sigurlaug B. Gröndal, 18.7.2007 kl. 10:54]

Já, Vallý mín, það er líka rétt, en það er svo hrikalega langt síðan en ótrúlega skemmtilegur tími!  Svo var ég skáti.  Það væri endalaust hægt að telja upp. Eins og ég var ritari Starfsmannafélagsins Sóknar á sínum tíma, var formaður Kirkjukórs Seljasóknar og er formaður kórs Þorlákskirkju. Hef verið í  fleiri slíkum störfum en það yrði alltof, alltof langt mál að telja það allt.  Áfram Ármann , hann lengi lifi!!!!

[Steingerður Steinarsdóttir, 18.7.2007 kl. 23:03]

Þetta var þér líkt, blessaður ættarsóminn.