Nú drynur í berginu.......

Í dag var bjart í Þorlákshöfn, jafnvel sólin braust fram og var það kærkomin sjón eftir átök í veðrinu undanfarna daga. Á svona dögum er gott að fara með  Tinnu mína í gryfjuna til að hlaupa og sleppa af sér beislinu. Við fórum, ég og hundurinn minn hún Tinna í gryfjuna góðu, sem staðsett er "út á bergi" eins og sagt er hér í bænum. Til nánari skýringa þá er það rétt niður við sjóinn þar sem hesthúsin eru og gömul fiskeldisstöð. Þar við ströndina er hamrabelti mikið og brimið þar verður ógurlegt. Þarna hafa farist menn og einnig lítill drengur, er mér sagt. Sjórinn sogar að sér með ógnarkrafti. Í þeim veðraham sem hefur verið og þar sem hásjávað er hefur brimið þessa daga verið mikið og stórbrotið og brimið sést skella upp eftir berginu tugi metra upp í loftið héðan frá götunni, þar sem ég bý. Í gryfjunni í dag voru miklar drunur. Það var eins og heljar tröllkarl berði bergið með einhverju ógnarstórum hamri svo glumdi í. Það er titringur í loftinu á slíkum dögum. Mikilfenglegar drunur berast hingað heim að húsi. Fyrst í stað þegar við fluttum hingað, héldum við að margar stórvirkar vinnuvélar væru einhversstaðar að störfum í grenndinni. Svo reyndist ekki vera. Þetta var brimið. Í dag var það stórbrotið og þar sem við Tinna nutum útivistarinnar í gryfjunni við hlaup og göngu, þá drundi í berginu með djúpum bassadrunum. Það var mikilfenglegt.  Já, nú drynur í berginu.

Athugasemdir

[Steingerður Steinarsdóttir, 17.12.2007 kl. 16:57]

Þetta er frábærlega velskrifuð færsla hjá þér.

[Sigurlaug B. Gröndal, 18.12.2007 kl. 09:29]

Þakka þér fyrir Steinka mín. Ég var svona að reyna að koma þessari upplifun í orð eins vel og ég upplifi það. Þetta eru stórfengleg náttúruöfl sem þarna eru að verki og að heyra þessar miklu drunur og upplifa kraftinn frá hafinu er ólýsanlegt.

[Björg Árnadóttir, 18.12.2007 kl. 16:16]

Mér finnst sjórinn yndislegur og sérstaklega ef ég kemst í tæri við alvöru brim. Ég þyrfti greinilega að renna til þín við tækifæri!

[Sigurlaug B. Gröndal, 18.12.2007 kl. 17:16]

Endielga gerðu það Björg. Þú finnur heimilisfangið í skránni. Hef sama síma og í den. Vertu ávallt velkomin.

[Kjartan Pétur Sigurðsson, 22.12.2007 kl. 01:26]

Gleðileg jól og takk fyrir skemmtilegt bloggár :)

[Steingerður Steinarsdóttir, 23.12.2007 kl. 10:15]

Gleðileg jól og þakka þér alla skemmtunina hér á blogginu á liðnu ári. Megi næsta ár vera þér jafnfarsælt og vonandi hittumst við með hundana okkar einhvern tíma.

[Valgerður Halldórsdóttir, 23.12.2007 kl. 12:36]

Óskar þér og þinni fjölskyldu Gleðilegra jóla - nú er bara að sjást á nýju ári