Kuldaboli bítur og norðurljósin dansa

Ja, nú er frost á Fróni. Ég var á leið minni frá dóttur minni í gærkvöldi og heim. Þegar ég settist upp í bílinn og setti hann í gang var mér litið á hitamælinn í bílnum sem mælir hita bæði innan í honum og utan. Inni í bílnum voru -10°c og úti voru -17°c!. Vá! Ég ók sem leið lá upp úr Breiðholtinu og upp að Rauðavatni, þar var frostið komið niður í -18°c. Toppurinn var rétt áður en komið var að Sandskeiði -20°c. Svo mikið frost hefur ekki komið hér í nokkur ár. Gosflaska sem var í bílnum hafði náð því að botnfrjósa um nóttina. Ekki nema von að sundlaugar séu lokaðar á vesturlandi og víða. Það þarf ansi mikið heitt vatn til að kynda upp  hýbýlin þessa dagana. Í gærkvöldi var sem sá stórkostlegasti norðurljósadans sem ég hef séð. Þau flögruðu á ógnarhraða neon græn, hvít og bleik. Skilyrðin voru mjög góð. Heiðskírt  og hrökufrost. Þvílíkt sjónarspil. dóttir mín náði nokkrum myndum af þeim. Ef heiðskírt verður í kvöld ætti fólk að fara út og kíkja til himins og sjá hvort þetta endurtaki sig. Góða helgi.

Athugasemdir

[Ragnheiður , 2.2.2008 kl. 14:52]

Við vorum með botnfrosna flösku í okkar bíl líka hérna suðurfrá. Það er ískalt. Ég ætla að kíkja eftir norðurljósum í kvöld.

[Helga Dóra, 2.2.2008 kl. 19:07]

Eldhústuskan mín var frosin í vaskinum undir glugganum í morgun.

[Linda Samsonar Gísladóttir, 2.2.2008 kl. 19:55]

Já, hann er kaldur!  En ég segi það satt, ég vil ekki skifta út birtunni og snjónum fyrir rok og rigningu. Fegurðin hér fyrir austan hvar ég bý, er ólýsanleg á svona vetrardögum!

[Steingerður Steinarsdóttir, 5.2.2008 kl. 10:45]

Ég sá svo glæsilega norðurljósasýningu um daginn að ég hef bara ekki séð annað eins. Þau voru grærn, gul, fjólublá og rauð og dönsuðu um himininn. Þetta var frábært.