Fáránlegur skattur.

Ég er ein af þeim sem hef ekið á nagladekkjum nánast allan minn ökuferil og hefur það bjargað mér margoft. Ég bjó í ein 20 ár í Seljahverfinu og þar sem og í efri byggðum er mjög oft ísing þó autt sé niður í bæ. Glæran sem þar oft myndast hefur gert mörgum sem ekki eru á nagladekkjum marga skráveifuna. Þarna eru brekkur og hver man ekki eftir vandræðunum oft í hálku á morgnana og á kvöldin á Seljabrautinni og Breiðholtsbrautinni! Fyrir 15 árum þegar þó flestir voru á nagladekkjum var ekki kvartað yfir svona mikilli svifryksmengun. Reyndar voru bílar færri þá en þá voru þungaflutningar á vörum og jarðefnum ekki eins mikill á götum borgarinnar sem og á þjóðvegunum. Atvinnubílstjóri sem ég heyrði viðtal við fyrir um 2 árum sagði af eigin reynslu að 30 tonna flutningabíll sem æki á malbiki sliti því á við einhverja hundruð eða þúsundir fólksbíla. Er ekki þarna verið að hengja bakara fyrir smið rétt einu sinni! Góðar stundir.

Leggjast gegn nagladekkjaskatti

Athugasemdir

[Björg Árnadóttir, 14.11.2008 kl. 16:34]

Skil vel þína punkta Silla og held að skattheimtan sé frekar léleg hugmynd. Samt ekki hálft eins léleg eins og þessi hér fyrir ofan. Hvernig í fj... á að vera hægt að banna umferð flutningabíla í borginni? Vörurnar vaxa ekki í hillum verslana svo einhvern vegin þarf að koma þeim á sinn stað svo við getum nálgast þær.

Eflaust valda flutningabílar líka einhverjum hluta svifryksmengunarinnar en ekki stórum. Slitið sem flutningabílarnir valda umfram fólksbílana er nefnilega aðallega í langtíma sliti á undirlagi veganna vegna þunga þeirra en ekki yfirborðinu sem rykast upp og veldur svifrykinu. Það sést best á hjólförunum, sem eru raun það sem er búið að rykast upp. Flutningabílar passa ekki í þessi hjólför þannig að stærsti hluti slitsins á yfirborðinu er af völdum fólksbíla.

Jæja... ég ætlaði nú bara að settja inn stutt og laggott komment en úr varð þessi langloka! Góða helgi!

[Steingerður Steinarsdóttir, 18.11.2008 kl. 16:27]

Ég er á heilsársdekkjum og ek auðvitað mest um borgina. Ég get því eiginlega ekki tekið afstöðu í þessu máli og hef gott af því einu sinni að þegja.