Ástandið á Laugaveginum - lítið umferð

Í útvarpsþættinum Reykjavík síðdegis 15. apríl er talað um bága stöðu á Laugaveginum. Rætt er þar við Gunnar Guðjónsson sjóntækjafræðing hjá Gleraugnamiðstöðinni. Ég er honum sammála í mörgu með ástandið þar. Verslun er orðin alltof einsleit og mikið af fyrirtækjum gefast upp. Ég átti leið um Laugaveginn í fyrradag ásamt eiginmanni, systur og mág sem búa í Bandaríkjunum. Við fórum inn í í galleríið á Laugavegi 67 og ræddum þar við einn af rekstraraðilunum ásamt því að skoða list. Að sögn þessarar listakonu hafa m.a. hvert galleríið á fætur öðru gefist upp þar vegna svimandi hárrar húsaleigu. Hún tók sem dæmi galleríið "Listafléttan" sem er á mótum Laugavegar og Bankastrætis, en að hennar sögn eru þeir um það bil að fara að loka eftir einungis 1 árs veru þar, en húsaleiga pr. mánuð er kr. 700.000,-! Það segir sig  sjálft að það stendur engin verslun undir slíkri leigu. Ég held að uppsprengt leiga eigi stóran þátt í því að verslanir gefast upp. Verslun á Laugaveginum er lítið spennandi, einsleit og léleg. Það eru komin alltof mörg hótel á þessum þrönga "bletti" og enn er verið að bæta í. "Túsistabúllur" hafa risið um allt og það er mín reynsla á ferðum mínum í útlöndum að ég forðast slíkar búðir eins og heitan eldinn. Þær innihalda allar sama varninginn á uppsprengdu verði. Ég tel að þarna þurfi að gera átak í að laða að fyrirtæki með fjölbreytta verslun og það gerist bara með lækkandi húsaleigu. Þetta er ömurlegt að sjá, hvernig komið er fyrir Laugaveginum.