Norðurljósin dansa dátt..........

Já þau dönsuðu svo sannarlega dátt rétt áðan. Ég var að koma inn af göngu með hana Tinnu mína og gengum við hérna stíginn upp fyrir bæinn. Það var yndislegt. Tunglið var að brjótast fram úr skýjunum og tunglsljósið skein í myrkrinu. Dans norðuljósanna var stórkostlegur. Skiptust litirnir í þeim frá neongrænu yfir í hvítt og bleikt. Það er langt síðan að þau hafi sést. Veðrið hefur séð til þess. Það var aðeins kul í lofti en ótrúlega stillt og gott veður. Mín var ánægð með tilveruna og fór eftir öllum þeim reglum sem henni eru settar í þessum ferðum. Ég var rosalega stolt af henni. Ég meira að segja sleppti henni og gekk hún alveg við hæl megnið af leiðinni til baka eða þar til ég sett á hana tauminn aftur. Eftir amstur vinnudagsins eru þetta dýrðarstundir.  Hugurinn hvílist og endurnærist. Vonandi fáum áfram svona yndislegt veður. Góða nótt og lifið heil.

Athugasemdir

[Eiríkur Harðarson, 21.11.2007 kl. 23:21]

Hvernig tekst þér Silla að sjá norðurljós í Þorlákshöfn? Veit ekki betur en að sá bær sé á Suðurlandinu.

[Sigurlaug B. Gröndal, 22.11.2007 kl. 10:15]

Alltaf ertu jafnspaugsmaður Eiríkur! Skemmtilegur orðaleikur. Ætli þau hafi bara ekki flutt sig um set. Þau voru svo stórkostleg og það sem ég hjó sérstaklega eftir var hvað ég sé þau miklu betur þarna heldur en þegar ég bjó á höfuðborgarsvæðinu. Ljósmengunin er svo mikil þar. Misstirðu af þessum ljósadansi?