Flóttamenn-hræðslan við hið óþekkta

Mér finnast viðbrögð bæjarbúa Akraness ansi harkaleg við ákvörðun um móttöku á flóttamönnunum frá Palestínu.  En því eru þau svo harkaleg? Hvaða fréttir er fólk að fá frá Palestínu? Hvaða mynd hefur fólk í huga sér um þessa þjóð og öðrum þjóðum frá þessum hluta heimsins? Stríð, ofbeldi, hryðjuverk? Hverjir hafa svo þjáðst í þessu stríði? Konur og börn.  Hvað kallar yfirleitt á svo neikvæð viðbrögð? Hræðsla! Hræðsla við hið óþekkta, við eitthvað sem fólk almennt þekkir ekki vel. Ég held að það væri mjög gott að kynna fyrir bæjarbúum menningu þessa fólks, umhverfi þess og lífi. Sjálf vinn ég þar sem bæði kennarar og nemendur eru frá fjöldamörgum ólíkum þjóðernum. Ég tel mig vera ríka að kynnast þessu fólki og eiga marga þeirra að góðum vinum.  Ég á líka góða nágranna sem koma frá öðru landi, ég á vini og tengdafólk frá löndum sem eru mjög ólík okkar landi, allt yndislegt fólk. Vanþekking er helsti óvinurinn - ekki fólkið.

Athugasemdir

[Steingerður Steinarsdóttir, 22.5.2008 kl. 10:58]

Þetta er alveg rétt hjá þér. Mér finnst að auki svolítið barnalegt að bera saman aðstæður heimilislausra hér á landi og fólks sem býr í flóttamannabúðum þar sem algjört vonleysi ríkir. Þar er ekki rennandi vatn, ekki skólar, lélegt skólp og engin von um að bæta aðstæður sínar.