Áramótahugleiðing

Áramótin í mínum huga eru alltaf sérstök stund.  Fyrir mér er miðnættið eins og að stíga yfir strik og ég yfirgef gamla árið og stend við endann á löngum, auðum vegi, nýja árinu. Nýja árið er eins og óskrifað hvítt blað fyrir framan mig og allt svo tært og nýtt og ómengað. Mér finnst þetta spennandi tímamót og hvað næsta ár ber í skauti sér veit enginn. Þetta er andartak tækifæranna, andartak væntinga, andartak nýs tíma, andartak hins ókomna. Árið er sporöskjulaga hringur, sem er mjóstur þar sem ágúst og september mætast. Flatur stuttur breiðari endinn er vikan frá Þorláksmessu að miðnætti 31. desember, þá verða skil og nýr hringur hefst, ljós og fagur, nýtt ár hefst. Þannig hefur þetta verið frá því ég var barn. Þessi hringur sem reis og hneig eftir árstíðum, sporöskjulaga hringrás tímans. Ekki veit ég hvernig aðrir skynja árið eða áramótin. Kannski eitthvað þessu líkt eða með allt öðru móti.  Nú í kvöld lýkur enn einum hringnum og nýr tekur við kl. 24:00.  Ég vil óska vinum og vandamönnum, öllum bloggvinum mínum, öllum sem hafa kíkt á bloggið mitt, öllum landsmönnum gleðilegs árs og friðar. Megi nýja árið færa öllum góða heilsu, gleði, gæfu, ný tækifæri, kjark og þor til að takast á við ný tækifæri í lífinu. Lifið heil.

Athugasemdir

[Steingerður Steinarsdóttir, 2.1.2008 kl. 12:37]

Ég skynja áramótin líka sem tímamót en þessi sporöskjulaga hringur finnst mér alveg frábær og nýstárlegur. Ég kannast ekki við að setja tímann svona myndrænt upp fyrir mér. Gleðilegt ár Siguglaug mín og megi nýja árið reynast þér farsælt í alla staði.

[Sigurlaug B. Gröndal, 2.1.2008 kl. 13:44]

Takk fyrir góða kveðju, Steinka mín. Já, það er svo skrítið hvernig þetta hefur birst mér sem hringur. Ég hef nú ekki haft orð á þessu þannig, en mér fannst ég þurfa að nefna þetta. Ég meira að segja horfi á hringinn "hinumegin" þegar ég lít til baka eða horfi fram á við, hvar sem ég er stödd í hringnum.  Gleðilegt ár, Steinka mín og megi árið færa þér gæfu, gleði og góða heilsu.