NÚ ER ER BRJÁLUÐ!!!!!

Ég var að fá inn um lúguna greiðsluseðilinn vegna bílsins sem ég keypti fyrir ári síðan og ég fékk áfall um leið og ég varð ösku-þreifandi vond!!!! Afborgunin af bílnum hækkaði um tæð 11 þúsund.............já ellefu þúsund á milli mánaða. Svo eru matvælin að hækka, bensínið er upp úr öllu valdi, verðbólgan tæp 9% og þar kemur annar glaðningur þegar húsnæðislánin hækka. Hefur einhver ráð hvernig hægt er að segja upp galónýtri ríkisstjórn og mannskapnum sem stýrir óábyrgri frjármálastefnu hér á skerinu???? Ég er viss um að það hafi ansi margir fengið flogakast af þessu tagi í dag.

Algengt, held ég.

Ég held að þetta sé nokkuð algengt þegar verðhækkanir eiga sér stað þá sé verið að hækka gamla lagera sem ég tel með öllu óásættanlegt. Þetta er vara sem keypt er á lægra verði og ætti því að halda sínu gamla verði þar til nýjar sendingar berast. Það er nefninlega svo skrítið að þegar vara ætti að lækka þá gengur það sjaldnast til baka. Neytendur þurfa að vera vel vakandi þessa dagana vegna launahækkana. Berið saman verði milli verslana. Verðlagseftirlit þarf að vera virkt aldrei sem nú!

Gamlar vörur hækka í verði

VARÚÐ! Mikil hálka á Sandskeiði og Þrengslum

Ég var að koma úr bænum, ók sem leið frá Sandskeiði og í gegnum Þrengslin. Gífurleg hálka er frá Sandskeiði og alveg upp á Hellisheiði og í Þrengslum. Mikill hliðarvindur er og er vegurinn eitt gler. Bílar hafa verið að fjúka eða skríða til hliðar. Jeppabifreið sem ók á undan mér stöðvaði og fór út í kant rétt fyrir ofan  Litlu kaffistofuna áður en komið er að brekkunni vegna hálku. Sendiferðabifreið hafði runnið út af í Þrengslunum vegna hálkunnar og hliðarvinds. Sjálf átti ég í fullt í fangi með að halda bílnum á réttum kili vegna hálku og hliðarvinds. Aksturshraði var um 50-60 km hraði hámark. Stórir flutningabílar, "trailerar" biðu beggja vegna Skógarbrekkunnar, Þorlákshafnarmegin eftir því að Vegagerðin sandbæri brekkuna. Þeir hvorki gátu ekið niður brekkuna né upp. Ég hringdi í Rás 2 og bað þá að vara fólk við sem þeir gerðu en lýstu ástandinu ekki nógu vel. BIÐ ÉG ALLA ÖKUMENN AÐ GÆTA FYLLSTU VARÚÐAR OG AKA RÓLEGA.  Vona ég að engin slys verði og allir skili sér heilir heim.

Frábært framtak!!!!!

Þetta líst mér vel á. Svona á þetta að vera. Við getum ekki endalaust tekið við hækkunum. Kjarasamningar eru í hættu og síðan á matvælaverð eftir að hækka upp úr öllu valdi.  Yfirvöld geta haft áhrif á verð eldsneytis til lækkunar. Fólk verður að láta í sér heyra. Áfram með smjérið!!!

Bílstjórar hætta aðgerðum

"Með kút og kork á sundi"!

Nú er íslenska krónan komin með kút og kork og komin á flot aftur. Ég vona að hún haldi sundtökunum áfram og sökkvi ekki til botns.  Hvenær er næsta sundnámskeið hjá Seðlabankanum?

Met sett í Kauphöll Íslands

Á hvaða "trippi" var þessi?

Ég segi nú ekki annað! Hvað hefur þessi verið búinn að taka inn? eða hversu ruglaðir geta menn verið? eða var þetta gert af hreinum ásetningi? Reyndar kom frétt fyrir um 20 árum þegar örbylgjuofnar voru töluvert stærri en þeir eru í dag og ekki eins algeng eign að kona á miðjum aldri í New York ætlaði að verma og þurrka hundinn sinn eftir kalsama og blauta útivist og ætlaði að flýta fyrir sér og setja hann í örbylgjuofninn í stað hins hefðbundna bakaraofns sem tekur tíma að hitna. Nú það sem gerðist með hundræfilinn að hann sprakk í ofninun og ofninn með og eldhúsið var víst illa út leikið af því sem eftir var af hundinum. Kaninn hefur nú alltaf verið dálítið "spes" eða þannig.

Fundinn sekur um að hafa sett dóttur sína í örbylgjuofn

Páskafrí - bara yndislegt!

Það hefur verið mikið að gera hjá mér undanfarið og hef því lítið bloggað.  Í síðustu viku var ég á mjög skemmtilegum ársfundi trúnaðarmanna hjá AFLI starfsgreinafélagi á Höfn í Hornafirði. Var mér boðið að halda erindi þar. Þetta var mjög skemmtilegur fundur og alveg frábært framtak hjá félaginu og glæsilegur fundur í alla staði. Þetta var þriðja árið í röð sem slíkur fundur er haldinn. Hluta af hópnum hafði ég verið að kenna fyrr í vetur og var einstaklega skemmtilegt að hitta þau. Ég vona að öll stéttarfélög landsins taki sig saman og haldi með reglulegu millibili þing trúnaðarmanna, þar sem allir trúnaðarmenn geti hist og borið saman bækur sínar. Trúnaðarmenn stéttarfélaganna gegna mjög veigamiklu hlutverki á vinnumarkaðnum  sem er óeigingjarnt hugsjónastarf fyrst og fremst og unnið af miklum eldmóð um allt land. Krafturinn í þessum hópi fólks er með ólíkindum og mjög vanmetinn  af vinnumarkaðnum.

Við gömlu æskuvinkonurnar Linda mín og ég ákváðum að setjast niður á kaffihúsi á föstudaginn. Við erum iðulega alltof uppteknar í vinnu okkar og tíminn því lítill. Samt er það nú þannig með okkur að það er alltaf eins og við hefðum verið að talast við deginum áður. Vinátta okkar hefur varað frá því við vorum 10 og 11 ára að hjóla saman og syngja saman í stigaganginum í Eskihlíðinni, þar sem við bjuggum. Við hittumst á Kaffi Milano og svo skemmtilega vildi til að ég hitti þar gamlan æskufélaga úr fimleikunum hér í den. Bróðir hans var skólafélagi vinkonu minnar. Við höfðum ekki sést í jah, vel yfir 20 ár allavega! Þetta var óvænt ánægja. Erum við Linda ákveðnar að hittast þarna reglulega og eiga okkar "qualitytime" í lok vinnudags.

Nú er langþráð páskafrí hafið. Þó er ég að syngja við fermingarmessur og páskamessu sem er fastur liður hjá mér. Það er hluti af páskahelginni og ómissandi. Hjá  mér hefur það alltaf verið hápunktur páskanna að vakna snemma á páskadagsmorgun, gera sig klára, fara út í kyrrð morgundagsins upp í kirkju, hita upp fyrir messuna, drekka morgunkaffi með kórfélögunum og syngja páskamessuna. Betra getur það varla orðið. Nú er um að gera að njóta hátíðarinnar með familíunni en krakkarnir koma í mat á páskadag. Sá yngsti verður reyndar á fjöllum með Hjálparsveitarfélögunum en kemur þaðan á páskadagskvöld. Í dag verður fermt hjá mági mínum í Kópavoginum og hlakka ég til að sjá elstu prinsessuna fermda. Það verður gaman að hitta alla á þessum hátíðisdegi.  

Ég óska öllum bloggvinum sem og öðrum gleðilegra páska með ósk um að þeir eigi góða daga yfir hátíðarnar.  

Þetta á að vera okkar sérstaða

Hér á Íslandi eigum við að stefna að því að landbúnaður hér verði að mestu lífrænn. Við eigum að halda okkar íslensku kúm sem hafa sérstöðu hvað varðar gæði mjólkur. Við eigum ekki að apa eftir öðrum þjóðum heldur skera okkur úr. Ferðamenn hér sækjast eftir hreinni náttúru, hreinum afurðum og lífrænni ræktun. Æ fleiri íslendingar kjósa hið sama bæði lífrænt ræktað grænmeti, ávexti, egg sem eru frá hænum sem ganga frjálsar og fleira í þessum dúr. Við erum ekki með hormónakjöt né afurðir af hormónafylltum gripum. Sjáið hvað hinn ungi íslendingur í New York er að gera með íslenska skyrið. Það verður að gera bændum kleift að fara af stað með slíkan búskap. Við megum heldur ekki eyðileggja þetta tækifæri með olíuhreinsunarstöð né of miklu stóriðjubrölti. Sígandi lukka er best og þeim löndum fer fækkandi sem geta státað sig af hreinni afurð og ómenguðu vatni. Bændur hér gefast upp ef þeir fá ekki stuðning. Nú er lag í að halda áfram á þessari braut. Persónulega kaupi ég lífrænar vörur, íslenskt grænmeti þó það sé miklu dýrara. Það er einfaldlega miklu betra. Safaríkt og gott. Höldum áfram á þessari braut.

Vantar peninga til að ýta undir lífrænan búskap

Meiri harka á vinnumarkaði - bein og óbein áhrif

Árið 1993-1995 var mikið atvinnuleysi hér á landi. Fyrir þann tíma voru margir sem voru með skerta starfsorku í hlutastörfum og störfum sem nánast má segja að hafi verið "eyrnamerkt" þeim hópum hjá bæði ríki og borg. Meira var um hlutastörf á þessum tíma. Á t.d. leikskólum tíðkaðist það í meira mæli að starfsmenn ynnu hálfan daginn eða hluta úr degi, þannig var það einnig í fleiri atvinnugreinum. Hjá borginni var þó nokkuð af störfum sem voru nánast "eyrnamerkt" þeim sem ekki höfðu fulla starfsgetu, hvort sem um var að ræða andlega eða líkamlega, svo sem hjá Gatnamálastofu (þ.e. malbikun, hellulagnir, aðstoðarstörf hverskonar) einnig í eldhúsum borgarinnar og í garðyrkju. Í dag eru þessi verk boðin út. Malbikunarstöðin er einkarekin, viðhald fer í útboð svo ekki eru þessi störf lengur til staðar. Eldhúsin eru stærri og færri og meira vélvædd. Vinnumarkaðurinn er harðari, gerir kröfur um fullt starf og gott betur. Það er ekki pláss fyrir þá sem eru ekki með fulla starfsgetu og hvað gerist þá? Þeir fara á fulla örorku og heilsa þeirra oft á tíðum versnar. Það að vera ekki þátttakandi í hinu daglega amstri mannlífsins og eiga fastan punkt dags daglega dregur  úr lífsgæðum fólks.  Það er einnig fylgni á milli aukins atvinnuleysis og auknum  greiðslum úr sjúkrasjóðum stéttarfélaganna. Atvinnuleysi hefur víðtæk áhrif á heilsu manna og iðulega til hins verra.  Undirstaða sjálfsvirðingar og sjálfstraust er að hafa vinnu og geta séð fyrir sér og sínum. Þegar vinnan fer og einstaklingi er ekki gefið tækifæri til að taka þátt í hringiðunni og eiga sér fastan stað í tilverunni með vinnufélögum og að vera virkur þá liggur leiðin niður á við. Í dag er einfaldlega ekki pláss fyrir fólk með skerta starfsgetu á vinnumarkaðnum, því miður. Ég vona að hér verði viðhorfsbreyting og allir fái pláss. Því var sorglegt að tekin hafi verið ákvörðun um að loka Bergiðjunni. Það mætti frekar fjölga síkum úrræðum fyrir þá sem eru að feta sig út á vinnumarkaðinn aftur.

Nýskráning öryrkja fylgir sveiflum á atvinnuleysi

Fólk flykkist í Bónus og Krónuna........

Fólk flykkist í Bónus og Krónuna

Íslendingar velja sem aldrei fyrr að kaupa í matinn í lágvöruverðsverslunum. Allt að hundrað prósent meiri sala hefur ve...

Þessi frétt birstist á visi.is í dag. Ég er ekki hissa á því að fólk flykkist í lágvöruverslanir.  Munur á verði á matvöru milli Krónunnar, Bónus annars vegar og svo Hagkaups og Nóatúns hins vegar. Það munar hvort þú kaupir 170 gr. skyrdós frá MS á kr. 70,- eða hvort þú kaupir hana á nærfellt 100 krónur, svo dæmi séu nefnd. Verðmunurinn er ansi mikill á algengustu vörum sem heimilið notar. Þegar munar orðið um 10-15 krónur á hverri vörutegund erum við að tala um drjúga upphæð. Svo þegar bensínlítrinn er kominn í yfir 140 krónur, þá verður heimilið að gera ráðstafanir. Lánin hafa hækkað upp úr ölluvaldi frá því í desember og janúar s.l..  Mæli með því að fólk fái sér dælulykil hjá Atlansolíu og kaupi bensínið á 136,4 krónur (í Hveragerði t.d. eins og ég geri) og annarsstaðar á ríflega 138 krónur. Hættum að jánka öllu og verslum þar sem ódýrara er.